Gwasanaethau Digidol » Llyfrgell ac Adnoddau Dysgu (LLR) » Strategaeth a Polisïau » Siarter Cwsmeriaid

Siarter Cwsmeriaid

Rydym yn ymrwymedig i ddarparu gwasanaeth o ansawdd uchel ar gyfer pawb sy’n defnyddio gwasanaeth y Llyfrgell ac Adnoddau Dysgu. Ein nod yw gweithio’n gydweithredol ac mewn partneriaeth â’n cwsmeriaid i gynnig mannau dysgu, cyfleusterau ac adnoddau arloesol ac effeithiol, ar y safle ac ar-lein. Mae ein Siarter Cwsmeriaid wedi’i seilio ar ein gwerthoedd a’n hymrwymiadau, mae’n crynhoi’r hyn y gallwch ei ddisgwyl gennym ni.

Ein gwerthoedd

Herio Anghydraddoldeb

Gwrando’n Ofalus

Meddwl yn Feirniadol

Cydweithio’n Greadigol

Diogelu Preifatrwydd

Darganfod yn Rhydd

Ein hymrwymiad i chi yw y byddwn yn gwneud y canlynol:

Sicrhau mai’ch anghenion chi yw ffocws y gwasanaethau a’r casgliadau a ddarparwn a’n bod yn defnyddio ein hadnoddau’n effeithiol er budd ein cwsmeriaid.
Eich cefnogi a’ch helpu i gael eich grymuso, i fod yn feirniadol ac yn annibynnol wrth ddefnyddio gwybodaeth ac i fanteisio i’r eithaf ar yr amrywiaeth eang o adnoddau sydd ar gael.
Trin ein cwsmeriaid â chwrteisi, proffesiynoldeb a pharch cyfartal, gan ddarparu gwasanaeth amserol a rhagweithiol. Bydd modd adnabod staff wrth eu henw a byddant yn ymrwymedig i weithio gyda chi i ddatblygu partneriaethau cadarnhaol.
Hyfforddi a datblygu ein staff i ddelio ag ymholiadau’n briodol a byddant yn wybodus am ein gwasanaethau a’n cyfleusterau.
Cyfathrebu â chi mewn modd eglur, amserol a chywir drwy amrywiaeth o sianelau a rhoi cyhoeddusrwydd i’n hystod o wasanaethau, telerau ac amodau, oriau agor, a’ch hysbysu am unrhyw newidiadau.
Bod yn ymrwymedig i ddarparu ardaloedd dysgu croesawgar, diogel, cyfforddus ac o safon uchel sy’n ysbrydoli ac sy’n addas at eich helpu i astudio ac ymchwilio.
Gweithio’n gydweithredol ar draws yr holl brifysgol, ymgysylltu’n weithredol â’r cymunedau academaidd a phroffesiynol ehangach er mwyn rhannu a lledaenu arfer gorau.

Ein hymrwymiad i chi yw y byddwn yn gwneud y canlynol:

Cario’ch cerdyn myfyriwr gyda chi bob amser, deall pam rydym yn gofyn am ei weld a pheidio â’i fenthyg i unrhyw un arall ac os ydy ar goll rhoi gwybod am hynny cyn gynted â phosibl
Bod â disgwyliadau uchel ohonom, dweud wrthym beth rydym yn ei wneud yn dda a lle gallwn wella drwy roi’ch adborth ac awgrymiadau i ni
Cadw at ein cod ymddygiad ystyriol, ystyried hawliau cyd-gwsmeriaid wrth ddefnyddio ein hardaloedd ffisegol a chadw at unrhyw gyfyngiadau a ddefnyddir mewn ardaloedd penodol
Dilyn ein rheoliadau, telerau, amodau a pholisïau o ran defnyddio adnoddau ac ardaloedd, gan drin staff, cwsmeriaid ac ymwelwyr â chwrteisi a pharch bob amser
Cymryd gofal rhesymol o’ch iechyd a diogelwch eich hun wrth ddefnyddio unrhyw rai o’n gwasanaethau a’n hardaloedd, gan ddarllen yr holl hysbysiadau Iechyd a Diogelwch a Thân
Ein helpu i ofalu am ein hardaloedd dysgu a dangos parch at bobl eraill drwy eu gadael yn lân ac yn daclus. Gallwch wneud hyn drwy ddod â bwyd a diod oer yn unig, neu ddiodydd poeth â chlawr, i mewn i’r holl lyfrgelloedd ac wedyn defnyddio’r biniau a’r cynwysyddion ailgylchu a ddarperir ar gyfer gwaredu sbwriel
Defnyddio’r adnoddau a ddarparwn yn gyfrifol ac yn unol â thelerau eu defnyddio, hawlfraint, y gyfraith, cytundebau trwyddedu a rheoliadau’r Brifysgol

Ni chaniateir plant a phobl ifanc dan 16 oed yn ein llyfrgelloedd ond os oes oedolyn gyda nhw. Mae plant yn gyfrifoldeb yr oedolyn sydd gyda nhw tra byddant yn adeiladau’r Llyfrgell, a rhaid i’r oedolyn sicrhau goruchwyliaeth a rheolaeth ddigonol bob amser.